ایشیاکپ: گوتم گمبھیر کا تماشائیوں کو نازیبا اشارہ۔۔سابق کرکٹر کا ردعمل بھی آگیا

پالی کیلے:بھارت کے سابق کرکٹر گوتم گمبھیر کی ایک ویڈیو سوشل میڈیا پلیٹ فارم ایکس پر خاصی وائرل ہے جس پر اب گمبھیر نے وضاحت بھی پیش کردی ہے۔پیر کے روز گوتم گمبھیر کی ایک ویڈیو سامنے آئی تھی جس میں وہ اسٹیڈیم سے باہر جاتے ہوئے تماشائیوں کو نعرے لگانے پر نازیبا اشارہ کرتے ہیں۔اب ایکس پر متعدد ویڈیوز وائرل ہیں جن میں گمبھیر کے پیچھے مختلف نعرے لگائے جارہے ہیں، کچھ بھارتی صارفین نے دعوی کیا کہ تماشائیوں نے ‘کوہلی کوہلی’ کے نعرے لگائے تھے جس پر گمبھیر کو غصہ آیا اور انہوں نے یہ نازیبا حرکت کی۔دوسری جانب اس ویڈیو سے متعلق دیگر صارفین کا کہنا ہے کہ کوہلی کوہلی کے نعروں والی آواز کو ایڈٹ کیا گیا ہے، گمبھیر نے بھارت کے خلاف نعرے بازی کرنے والے پاکستانی شائقین کو یہ اشارہ کیا۔ میڈیا سے گفتگو کے دوران جب صحافی نے سابق کرکٹر سے اس وائرل ویڈیو سے متعلق سوال کیا تو انہوں نے کہا ‘سب سے پہلی بات تو یہ کہ سوشل میڈیا پر جو بھی دکھایا جاتا ہے وہ سب سچ نہیں ہوتا، لوگوں کا جو دل کرتا ہے چلاتے ہیں۔گوتم گمبھیر نے پاکستانی تماشائیوں پر الزام عائد کرتے ہوئے کہاجو ویڈیو وائرل ہوئی اس کی سب سے بڑی سچائی یہ ہے کہ اگر آپ بھارت کے خلاف نعرے لگائیں گے، اگر آپ یہ کہیں گے کہ ہندوستان مردہ باد یا آپ کشمیر کے بارے میں بات کریں گے تو بندہ کوئی نہ کوئی ردعمل تو دے گا یا پھر بندہ ہنس کے چلا جائے گا۔سابق کرکٹر نے دعوی کیا کہ ‘کراوڈ میں کچھ پاکستانی لوگ تھے جو بھارت کے خلاف چیزیں بول رہے تھے، اسی لیے میں نے یہ کیا۔واضح رہے کہ گزشتہ ہفتے پاک بھارت میچ کے موقع پر گوتم گمبھیر نے ویرات کوہلی کی پاکستانی کھلاڑیوں کے ساتھ دوستانہ اور خوشگوار ماحول میں بات چیت پر سخت ناپسندیدگی کا اظہار کیا تھا۔گوتم گمبھیر نے کہا تھا کہ بھارتی کھلاڑیوں کو میچ کے دوران پاکستانی کھلاڑیوں سے گھلنا ملنا نہیں ملانا چاہیے تھا، بھارتی ٹیم اسٹیڈیم میں 140 کروڑ لوگوں کی نمائندگی کررہی ہے، اسے پاکستانی کھلاڑیوں سے دوستی نہیں نبھانی چاہیے۔گمبھیر کے اس بیان کے بعد انہیں بھارت و پاکستانی صارفین کی جانب سے شدید تنقید کا نشانہ بنایا گیا تھا۔