جیل میں عمران خان کےساتھ ناروا سلوک۔۔پی ٹی آئی کور کمیٹی کی شدید مذمت

اسلام آباد:پی ٹی آئی کور کمیٹی اٹک جیل میں چیئرمین تحریک انصاف کو قانون کی صریح خلاف ورزی کرتے ہوئے قیدِ تنہائی میں رکھنے کی شدید مذمت کرتی ہے۔پاکستان تحریک انصاف کی کور کمیٹی کا اہم اجلاس ہوا۔
پاکستان تحریک انصاف کی کور کمیٹی کے اجلاس کے اعلامیہ میں کہا گیا ہے کہ اٹک جیل میں چیئرمین تحریک انصاف کو قانون کی صریح خلاف ورزی کرتے ہوئے قیدِ تنہائی میں رکھنے کی شدید مذمت کرتی ہے ۔قانون کے مطابق چیئرمین تحریک انصاف کو جیل میں بنیادی سہولیات کی بدستور عدم دستیابی بھی ظلم و سفاکیّت ہے ۔چیئرمین تحریک انصاف کی درخواست پر سپریم کورٹ میں آج کی سماعت اور عدالتِ عظمیٰ کی آبزرویشنز خوش آئند قرار دیا گیا۔عدالت سے سزا یافتہ مجرمہ مریم نواز کی سرکردگی میں چیف جسٹس آف پاکستان سمیت ساتھی ججز کیخلاف شرانگیز پراپیگنڈہ مہم، دھونس اور غنڈہ گردی کے ذریعے عدالتی فیصلوں پر اثرانداز ہونے کی شرمناک کوشش ہے۔
پاکستان تحریک انصاف نوّے روز کی آئینی مدت کے اندر انتخابات کے انعقاد کا بھی پرزور مطالبہ کرتی ہے ۔صدرِمملکت کی بذریعہ خط چیف الیکشن کمشنر کو انتخابات کے انعقاد کے حوالے سے مشاورت کی دعوت خوش آئند ہے۔
اجلاس میں چیف الیکشن کمشنر پر آئین کی حدود سے تجاوز کی روش ترک کرنے اور انتخابات کے 90 روز کی دستوری مدت میں انعقاد کیلئے تیاریاں تیز کرنے کیلئے زور دیا گیا۔اجلاس میں بدترین معاشی تباہی اور اس سے نہایت تیزی سے پھیلتی غربت کا بھی مفصل جائزہ لیا گیا۔بجلی، گیس اور خوراک سمیت بنیادی اشیائے ضروریہ پر عوام کی تیزی سے ختم ہوتی دسترس پر حکومتی بیعملی کی شدید ترین الفاظ میں مذمت کی گئی۔
کور کمیٹی کی جانب سے تحریک انصاف جنوبی پنجاب کے صدر سینیٹر عون عباس بپّی کے اغواء￿ کی بھی شدید مذمت اور ان کی فوری رہائی کا مطالبہ کیا گیا۔اجلاس میں پاکستان میں ’’حقیقی آزادی اور اصلی جمہوریت‘‘ کے حصول کے ہدف سے کسی صورت پسپائی اختیار نہ کرنے پر اتفاق کیا گیا۔تمام تر مصائب و مشکلات کے باوجود چیئرمین تحریک انصاف کی بلند پایہ، باہمّت اور اولوالعزم قیادت میں حقیقی آزادی اور اصلی جمہوریت کی تحریک آگے بڑھانے پر بھی مکمل اتفاق کیا گیا۔ریاست کے بدترین جبر اور وحشت کے سامنے سیسہ پلائی ہوئی دیوار کیطرح کھڑے ہونے اور قید و بند، انتقام و تضحیک اور ظلم و تشدد کے سامنے ہتھیار نہ ڈالنے پر خصوصاً دلیر خواتین کارکنان کو زبردست خراج تحسین پیش کیا گیا۔
کور کمیٹی تحریک انصاف کے مطابق چیئرمین تحریک انصاف کے بلند حوصلوں کو توڑنے کیلئے جیل میں ظلم و ستم کی سیاہ تاریخ رقم کی جارہی ہے، اللہ کی مدد اور نصرت سے چیئرمین تحریک انصاف کے حوصلے نہایت بلند ہیں اور وہ حقیقی آزادی و اصلی جمہوریت کے ہدف سے ایک انچ پیچھے ہٹنے پر آمادہ نہیں، ظلم و بربریت کی تاریک رات جلد ختم ہونے کو ہے۔
پاکستان چیئرمین تحریک انصاف کی قیادت میں اپنی اصل راہ پر گامزن ہوگا، مکمل اتحاد، یگانگت اور یکسوئی سے چیئرمین تحریک انصاف کی قیادت میں اپنی تحریک آگے بڑھائیں گے اور ملک کو قائد و اقبال کے پاکستان کی صورت میں ڈھالیں گے۔