مری کے ہوٹلوں پر سیاستدانوں کا راج ہے ، فضا علی کا انکشاف

لاہور : معروف اداکارہ اور ٹی وی میزبان فضا علی نے مری کے دورے کا تجربہ بیان کرتے ہوئے انکشاف کیا کہ وہاں کے ہوٹلوں پر سیاستدانوں کا راج ہے۔ اداکارہ نے حال ہی میں یوٹیوب پر مختصر دورانیے کی ویڈیو جاری کی جس میں انہوں نے اپنے حالیہ دورہ مری سے متعلق تفصیلات بتائیں۔ویڈیو میں فضا علی کا کہنا تھا انہوں نے بچوں کی فرمائش پر مری جانے کا فیصلہ کیا۔ مری جانے سے پہلے انہوں نے آن لائن ہوٹل کے کمرے دیکھے مگر وہاں پہنچے تو انہیں حیرانگی ہوئی کیوں کہ جو تصاویر انہیں دکھائی گئیں، کمرے ان سے مختلف تھے۔ انہوں نے کہا ہوٹل انتظامیہ نے ایک رات کا کرایہ20 ہزار روپے ایڈوانس میں وصول کیا مگر ہوٹل میں پانی ہی دستیاب نہیں تھا، جس وجہ سے وہ چار گھنٹے وہاں گزارنے کے بعد وہاں سے چلی گئیں۔ فضا علی نے مزید بتایا کہ انہوں نے ہوٹل انتظامیہ سے پانی کی عدم فراہمی پر بار بار شکایت بھی کی مگر کوئی فائدہ نہ ہوا جبکہ انہیں مذکورہ ہوٹل میں تین چائے کے 2 ہزار روپے ادا کرنے پڑے ۔ فضا علی نے کہا مری میں زیادہ تر ہوٹلوں کا کاروبار سیاستدانوں کا ہے جو منافع کمانے کے لیے اثررسوخ کا استعمال کرتے ہیں۔