عمران خان کی گرفتاری پر لاہور ہائیکورٹ بار ایسوسی ایشن کا شدید ردعمل۔۔

لاہور ہائیکورٹ بار ایسوسی ایشن نے عمران خان کی گرفتاری پر ردعمل کا اظہار کرتے ہوئے کہا ہے کہ توشہ خانہ کیس میں ایڈیشنل سیشن جج اسلام آباد نے چیئرمین پی ٹی آئی عمران خان کو جس عجلت میں سزا سنائی وہ فیئر ٹرائل اور متعلقہ قوانین کی سخت خلاف ورزی ہے اور سزا سناتے وقت اسلام آباد ہائیکورٹ کے حالیہ فیصلے کو بھی نظر انداز کیا گیا، چیئرمین تحریک انصاف کو صفائی کے حق سے محروم کر کے یہ فیصلہ سنایا گیا جو کہ افسوسناک ہے، اس طرح جلد بازی اور قانون کے تقاضوں کو پورا کئے بغیر یہ فیصلہ ظاہر کرتا ہے کہ اس فیصلے کے در پردہ قوتیں ہیں جو ملک میں جمہوری نظام کو چلنے نہیں دینا چاہتی اور اس بات پر بھی تشویش ہے کہ حکومتی اتحاد میں شامل جو سیاستدان اس عمل کا ساتھ دے رہے ہیں وہ اس چیز کو نظر انداز کر رہے ہیں کہ آئندہ انہیں بھی غیر جمہوری قوتوں کی طرف سے اس طرح کے حالات کا سامنا کرنا پڑ سکتا ہے۔