فلسطینی کیمپ میں دو گروپوں میں تصادم

بیروت: لبنان میں فلسطینی مہاجر کیمپ میں دو گروپس میں جھڑپوں میں 5افراد جاں بحق ہوگئے،غیر ملکی میڈیا کے مطابق جنوبی ساحلی شہر صیدا میں واقع عین الحلوہ مہاجر کیمپ میں ایک حملے میں فلسطینی صدر محمود عباس کی پارٹی الفتح کے کمانڈر اشرف العرموشی اور ان کے چار ساتھی ہلاک ہوگئے،جھڑپوں میں بھاری ہتھیاروں کا بھی استعمال ہورہا ہے۔ دونوں فریق کلاشن کوف، راکٹ لانچرز اور دستی بموں سے ایک دوسرے کو نشانہ بنارہے ہیں،اس سے قبل فتح کے مخالف مذہبی مسلح گروہ کے کمانڈر محمود خلیل پر ایک حملہ ہوا تھا جس میں وہ محفوظ رہے تاہم ان کے ایک ساتھی جاں بحق ہوگئے تھے۔ اس مذہبی گروہ کے مسلح افراد نے الفتح پر اس واقعے میں ملوث ہونے کا الزام لگایا اور بدلے میں الفتح کے ہیڈ کوارٹرز پر فائرنگ کی جس میں الفتح کے کمانڈر سمیت 5افراد جاں بحق ہوئے،فلسطینی مہاجرین کی فلاح و بہبود کے اقوام متحدہ کے ادارے انروا کا کہنا ہے کہ جھڑپوں میں متعدد افراد زخمی ہوئے جن میں دو بچے بھی شامل ہیں،جھڑپوں کی وجہ سے متعدد فلسطینی اپنے گھروں سے نقل مکانی کرکے محفوظ علاقوں کی طرف منتقل ہوگئے ہیں،عین الحلوہ کیمپ میں تقریبا 55ہزار لوگ رہائش پذیر ہیں۔ یہ کیمپ 1948میں اسرائیلی افواج کے ہاتھوں بے گھر ہونے والے فلسطینیوں کی رہائش کے لیے قائم کیا گیا تھا۔