اسد قیصر پر کتنے مقدمات درج، تفصیلات سامنے آگئیں

اسلام آباد پولیس نے ہائی کورٹ میں رپورٹ جمع کرائی ہے کہ سابق اسپیکر قومی اسمبلی اسدقیصر کےخلاف مختلف تھانوں میں 7مقدمات درج ہیں۔ آخری مقدمہ 18مارچ 2023 کو درج کیا گیا۔ عدالت نے کل تک مکمل رپورٹ طلب کر لی اسلام آباد ہائی کورٹ کے جسٹس ارباب محمد طاہر نے سابق اسپیکر قومی اسمبلی اسدقیصر کےخلاف درج مقدمات کاریکارڈ فراہم کرنے کی درخواست پر سماعت کی۔ درخواست گزار کی جانب سے بابراعوان ایڈووکیٹ عدالت میں پیش ہوئے اور کہا کہ ابھی تک نہیں معلوم کہ پٹیشنر کے خلاف کتنے مقدمات درج ہیں ؟عدالت سے استدعا ہے پولیس کو ریکارڈ فراہم کرنے کے احکامات جاری کرے ۔ پولیس نے اسدقیصر کیخلاف درج 7مقدمات کا ریکارڈ عدالت میں پیش کیا جس کے مطابق اسد قیصر کے خلاف تھانہ کوہسار،آبپارہ،انڈسٹریل ایریا، سنگجانی اور تھانہ گولڑہ شریف میں دو جبکہ ایک مقدمہ سی ٹی ڈی میں درج ہے۔ عدالت نے متعلقہ حکام کو کل تک دیگر مقدمات کے حوالے سے مکمل رپورٹ جمع کرانے کا حکم دیتے ہوئے سماعت ملتوی کر دی