اقوام متحدہ دہشت گردی کی لعنت کے خاتمے کے لیے افریقی ممالک کے ساتھ کھڑا ہے، انتونیو گوٹریس

نیو یارک:اقوام متحدہ کے سیکرٹری جنرل انتونیو گوتریس نے کہا ہے کہ اقوام متحدہ دہشت گردی کی لعنت کے خاتمے کے لیے افریقی ممالک کے ساتھ کھڑا ہے،دہشت گردی بہت سے مسائل کی جڑ اور نتیجہ ہے، اقوام متحدہ کی سلامتی کونسل میں اقوام متحدہ اور علاقائی تنظیموں اور میکانزم کے درمیان تعاون کو مضبوط بنا کر دہشت گردی کا مقابلہ کرنا اور تشدد کی روک تھام کے عنوان سے منعقدہ اجلاس سے خطاب میں انہوں نے کہا کہ دہشت گردی ،سلامتی کونسل میں بحث ہونے والے متعدد مسائل کی جڑ اور ان کا نتیجہ ہے، دہشت گردی نے سیاسی، اقتصادی اور سیکیورٹی نظاموں کی خامیوں اور عدم استحکام سے استفادہ کرتے ہوئے اپنے اثرِ رسوخ میں اضافہ کیا ہے،سیکرٹری جنرل اقوام متحدہ نے کہا کہ مایوسی، غربت، بھوک، بنیادی خدمات کی کمی اور بے روزگاری جیسی وجوہات دہشت گرد گروہوں کے پھیلا ئوکے لیے ایک زمین ہموار کر رہی ہیں،انہوں نے کہا کہ جس طرح دہشت گردی لوگوں کو الگ کر دیتی ہے، اسی طرح اس کے خلاف مزاحمت کرنا ممالک کو اکٹھا کر سکتا ہے۔اقوام متحدہ دہشت گردی کی لعنت کے خاتمے کے لیے افریقی ممالک کے ساتھ کھڑا ہے، جس میں سلامتی کونسل کی سیاسی رہنمائی، مدد اور پابندیاں شامل ہیں،گوٹریس نے اس بات پر زور دیا کہ انسداد دہشت گردی کو انسانی حقوق کے مرکز میں جگہ دی جانی چاہیے،گوٹریس نے کہا کہ وہ جلد ہی نائجیریا کے ساتھ افریقی انسداد دہشت گردی سمٹ کا اہتمام کریں گے۔