آئی ایم ایف سے اگر پیسے نہیں ملتے تو ہم ڈیفالٹ کر جائیں گے،فواد چوہدری

لاہور : پاکستان تحریک انصاف کے رہنما فواد چوہدری نے کہا ہے کہ آئی ایم ایف سے معاہدہ نہیں ہورہا، آئی ایم ایف سے پیسے نہیں ملتے تو ہم ڈیفالٹ کر جائیں گے،انہوں نے دعوی کیا آئی ایم ایف نے کہا ہے پاکستان لانگ رینج میزائل کا پروگرام روک دے۔ لاہور میں میڈیا سے گفتگو کرتے ہوئے فواد چوہدری نے کہا ہے کہ پاکستان کو معاشی مشکلات کا سامنا ہے،ملکی معیشت کی تباہی کے بعد اسحاق ڈار اب ملکی سلامتی سے کھیل رہے ہیں۔ انہوں نے کہا اسحاق ڈار کا گزشتہ روز کا بیان نئے بحران کی جانب اشارہ ہے،مفتاح اسماعیل نے معیشت کی تباہی کا جو مشن شروع کیا اسحاق ڈار اسے مکمل کر رہے ہیں،اسحاق ڈار کی وجہ سے آئی ایم ایف اور باقی اداروں کے ساتھ تعلقات متاثر ہوئے ہیں۔ انہوں نے کہا کہ ہر جانب سے عمران خان،عمران خان کی آوازیں آ رہی ہیں،چیئرمین پی ٹی آئی تو کہتے ہیں وہ بات چیت کے لیے تیار ہیں،ملک میں انتشار سر اٹھا چکا ہے۔ فواد چوہدری نے کہا ملک میں معاشی بحران کے ذمہ دار شہبازشریف ہیں،پٹرول سمیت ہر چیز مہنگی کر دی ہے، لوگ بچوں کو پیدل سکول چھوڑنے جاتے ہیں کیونکہ پٹرول ڈلوانے کے پیسے نہیں، لیکن حکومت دن رات عمران خان کے پیچھے لگی ہے۔فواد چو ہدری کا کہنا تھا کہ لاہور میں آج امن لاہور ہائیکورٹ کی وجہ سے ہے، جسٹس طارق سلیم شیخ کو اسکا تمام کریڈٹ جاتا ہے، عدالتی حکم پر رات کو ہماری ملاقات ہوئی، آج جو حل تلاش کیا عدالت میں بتائیں گے۔سابق وفاقی وزیر نے کہا کہ آئی جی پنجاب اور چیف سیکرٹری سے ملاقات ہوئی ہے، ہمارے معاملات طے پا چکے ہیں ، پنجاب پولیس عمران خان کو سکیورٹی دینے کے لیے تیار ہے۔