انتخابات میں تاخیر نہیں ہوگی ، پختہ یقین ہے وقت پر ہوں گے،صدر عارف علوی

اسلام آباد:صدر مملکت ڈاکٹر عارف علوی نے کہا ہے کہ انتخابات میں تاخیر نہیں ہوگی ، پختہ یقین ہے کہ انتخابات وقت پر ہوں گے،بروقت انتخابات سے ملک کی سیاسی اور معاشی صورتحال میں بہتری کی راہ کھلے گی، ہماری تاریخ ثابت کرتی ہے کہ انتخابات میں تاخیر سے جمہوریت کو نقصان پہنچا،گورنر خیبرپختونخوا ایک جمہوری شخص ہیں ، ان خیالات کا اظہار صدر عارف علوی نے کونسل آف پاکستان نیوز پیپرز ایڈیٹرز کے وفد سے گفتگوکرتے ہوئے کیا۔صدر مملکت نے پاکستان کے آئین کی پاسداری کی ضرورت پر زور دیا۔صدر مملکت نے کہا کہ گورنر کو آئین اور سپریم کورٹ کے حکم کے مطابق انتخابات کی تاریخ مقرر کرنے کا مشورہ دیا، بحیثیت صدر اپنا آئینی کردار ادا کررہا ہوں، سپریم کورٹ نے بھی فیصلوں کی توثیق کی ، اختلافات کم کرنے ، سیاسی جماعتوں میں مفاہمت کے فروغ کے لیے اپنا کردار ادا کیا، ملک کی خاطر کسی بھی شخص یا سیاسی جماعت سے ملنے کو تیار ہوں ،پی ٹی آئی کی قیادت کو بھی دیگر سیاسی جماعتوں سے مذاکرات کرنے کا کہا ، انہوںنے کہاکہ حکومت کے ساتھ اچھے تعلقات ہیں، پختہ یقین ہے کہ پاکستان ڈیفالٹ نہیں کرے گا، بہتر اور موثر مالیاتی انتظام ملک کو درپیش معاشی مشکلات پر قابو پانے میں مدد دے سکتا ہے،کرپشن کے خلاف ہوں کیونکہ اس نے پاکستان کو بری طرح نقصان پہنچا یا اسی لیے نیب ترمیمی بل واپس کیا، فیصلہ سازی میں تاخیر، میرٹ کی خلاف ورزی، اقربا پروری اور کرپشن نے پاکستان کو کھوکھلا کیا،میڈیا سچے اور ذمہ دارانہ تجزیے اور آراء￿ پیش کرکے لوگوں کو تعلیم دے ، نئے میڈیا کے عروج کے باوجود پرنٹ میڈیا اب بھی لوگوں کی رائے تشکیل دینے ، اہم مسائل سے آگاہ کرنے میں اہم کردار ادا کر رہا ہے، صدر مملکت نے پاکستان میں اظہار رائے کی آزادی کو برقرار رکھنے کی ضرورت پر بھی زور دیا۔