کراچی گیمز 2023 ویٹ لفٹنگ کے مقابلوں

کراچی :ایڈمنسٹریٹر کراچی ڈاکٹر سید سیف الرحمن نے کہا ہے کہ اسپورٹس مین زندگی میں آنے والے چیلنجز کا سامنا اچھے طریقے سے کرسکتے ہیں، نوجوانوں کے کھیل کی سرگرمیوں میں حصہ لینے کی بھرپور حصہ افزائی کی جانی چاہئے،بلدیہ عظمیٰ کراچی کراچی گیمز کے بعد بھی شہر کی سطح پر کھیلوں کو سپورٹ کرتی رہے گی، ویٹ لفٹنگ کے مقابلوں میں نوجوانوں کی دلچسپی اور لگن دیکھ کر خوشی ہوئی، یہ بات انہوں نے کورنگی نمبر 5 میں نسیم حمید اکیڈمی میں کراچی گیمز 2023 کے سلسلے میں ویٹ لفٹنگ مقابلوں کے شرکاء سے ملاقات اور کامیاب ویٹ لفٹرز کو میڈلز دینے کے بعد میڈیا کے نمائندوں سے گفتگو کرتے ہوئے کہی، ایڈمنسٹریٹر کراچی ڈاکٹر سید سیف الرحمن نے 60 کلو گرام وزن اٹھانے والی بچی کو شاباش دی اور کہا کہ اس سے معلوم ہوتا ہے کہ ویٹ لفٹنگ سمیت دیگر کھیلوں میں پاکستان کا مستقبل روشن ہے، انہوں نے کہا کہ کراچی گیمز میں شرکت کرنے والے ویٹ لفٹرز صوبائی اور قومی سطح کے کھلاڑی ہیں اور مجھے یہ جان کر انتہائی خوشی ہوئی ہے کہ اس چیمپئن شپ میں مقابلوں کا معیار انتہائی اعلیٰ دیکھنے میں آیا ہے، انہوں نے کہاکہ بلدیہ عظمیٰ کراچی ویٹ لفٹنگ کے کھیل کے فروغ کے لئے ہر سطح پر اقدامات کرے گی، نسیم حمید اکیڈمی کورنگی میں خواتین کے لئے خصوصی کھیلوں کے مقابلے منعقد کئے جائیں گے، انہوں نے ویٹ لفٹنگ مقابلوں میں جیتنے والے ویٹ لفٹرز کو مبارکباد دی اور کہا کہ میڈلز نہ حاصل کرنے والے شرکاء مایوس نہ ہوں اور مستقل مزاجی کے ساتھ اس کھیل میں اپنی مہارت کا حصول جاری رکھیں ایک دن وہ بھی ضرور کامیاب ہوں گے۔