ایران کی نجی ایئرلائن کی پرواز کی الماتے میں ہنگامی لینڈنگ ، تمام مسافر محفوظ

تہران :ایران کی نجی ایئرلائن کی دارالحکومت تہران سے بیجنگ کے لیے روانہ ہونے والی پرواز میں روس کی فضائی حدود میں ہنگامی صورتحال پیدا ہوگئی جس پر طیارے نے قازقستان کے الماتے ایئرپورٹ پر ہنگامی لینڈنگ کرائی گئی۔ غیر ملکی خبر رساں ادارے کے مطابق ایوی ایشن ذرائع نے بتایا کہ ماہان ایئر پرواز ڈبلیو 579 نے تہران انٹرنیشنل ایئرپورٹ سے بیجنگ کے لیے اڑان بھری۔لگ بھگ ڈھائی گھنٹے کی پرواز کے بعد ایئربس اے 340 طیارہ روس کی فضائی حدود میں 35 ہزار فٹ کی بلندی پر تھا کہ طیارے میں ہنگامی صورتحال پیدا ہوگئی اور جہاز نے اچانک بلندی کھونا شروع کر دی۔ایئر ٹریفک کنٹرول کے رابطہ کرنے پر پائلٹ نے قازقستان کے الماتے ایئرپورٹ پر ہنگامی لینڈنگ کی۔ اس دوران لگ بھگ نصف گھنٹے تک تمام پروازوں کی لینڈنگ اور ٹیک آف روک دیا گیا تھا۔ تمام مسافر محفوظ رہے۔