تحریک انصاف کا الیکشن کمیشن کے پنجاب میں انتخابات کی تاریخ دینے کا خیرمقدم

اسلا م آباد: پاکستان تحریک انصاف کے رہنما فواد چوہدری نے کہا ہے کہ الیکشن کمیشن کی جانب سے صدرِ مملکت کو پنجاب میں انتخابات کے لیے تجاویز کا خیرمقدم کرتے ہیں ،یہ ملک، آئین اور تحریک انصاف کی بڑی کامیابی ہے۔سوشل میڈیا پر الیکشن کمیشن کے اقدام پر ویڈیو پیغام میں فواد چوہدری نے کہا کہ الیکشن کمیشن نے صدرِ پاکستان کو پنجاب میں انتخابات کے لیے تجاویز دیں۔پی ٹی آئی رہنما نے کہا کہ الیکشن کمیشن کے اس اقدام کو سراہتا ہوں۔انہوں نے کہا کہ سپریم کورٹ کے حکم کے مطابق الیکشن کمیشن نے صحیح قدم اٹھایا ہے۔فواد چوہدری نے کہا کہ رمضان اور عیدالفطر کے پیش نظر الیکشن کمیشن نے یہ درست قدم اٹھایا ہے۔تحریک انصاف کے رہنما نے کہا کہ انتخابات کی حتمی تاریخ کا فیصلہ صدرِ مملکت نے کرنا ہے۔انہوں نے کہا کہ پوری قوم کو اس معاملے پر مبارکباد پیش کرنا چاہتا ہوں، یہ ملک، آئین اور تحریک انصاف کی بڑی کامیابی ہے۔