سپریم کورٹ فیصلہ، جیل بھرو تحریک معطل کرنے کا اعلان

لاہور:چیرمین تحریک انصاف عمران خان نے جیل بھرو تحریک معطل کرنے کا اعلان کردیا ہے۔ایک ٹویٹ میں عمران خان کا کہنا تھا کہ ہم جیل بھرو تحریک معطل کر کے پنجاب اور خیبر پختونخوا میں انتخابی مہم چلانے کے لئے آگے بڑھیں گے۔چیرمین تحریک انصاف عمران خان نے ملک میں مبینہ لاقانونیت، آئین شکنی اور روز افزوں مہنگائی کے خلاف 22 فروری سے پر امن جیل بھرو تحریک کے پہلے مرحلے کا آغاز کیا تھا۔جیل بھرو تحریک کا پہلا مرحلہ آٹھ روز پر مشتمل تھا۔پہلے مرحلے میں لاہور، پشاور، راولپنڈی،ملتان، گوجرانوالہ، سرگودھا،ساہیوال اور فیصل آباد میں جیل بھرو تحریک کے تحت گرفتاریاں دینے کا اعلان کیا گیا تھا۔ جیل بھرو تحریک پہلے مرحلے کے آٹھویں روز آج فیصل آباد میں تحریک انصاف کے کارکنوں نے گرفتاریاں دینے کا اعلان کر رکھا تھا لیکن پنجاب اور خیبرپختونخوا میں انتخابات سے متعلق سپریم کورٹ کے ازخود نوٹس کیس کا فیصلہ آنے کے بعد چیرمین تحریک انصاف عمران خان نے فیصلے کو خوش آئند قرار دیتے ہوئے جیل بھرو تحریک معطل کرنے کا اعلان کیا اور کہا کہ اب وہ پنجاب اور خیبر پختونخوا میں انتخابی مہم چلانے کے لئے آگے بڑھیں گے۔عمران خان نے اپنے ٹویٹ میں اس امید کا اظہار کیا کہ آئین کا تحفظ سپریم کورٹ کی ذمہ داری ہے اور سپریم کورٹ نے آج کے فیصلے سے اپنی ذمہ داری کو پورا کیا ہے۔