جیل بھرو تحریک، پنجاب حکومت نے حکمت عملی بنا لی

لاہور : پنجاب حکومت نے عمران خان کی جیل بھرو تحریک کو ناکام بنانے کےلئے ہر طرح کی حکمت عملی اپنانے کا فیصلہ کر لیا، نگران حکومت کی جانب سے پنجاب میں جیل بھرو تحریک کا حصہ بننے والے کے ساتھ انتہائی سختی سے نمٹا جائے گا، عمران خان کی کال پر احتجاج کرنے والوں کے بارے میں حکمت عملی بنا لی۔ ذرائع کے مطابق جو بھی طلبہ اس جیل بھرو تحریک میں شامل ہوں گے اْنکا کالج اور یونیورسٹی سے داخلہ کینسل کر دیا جائے گا۔ اسی طرح اگر کاروباری حضرات اس احتجاج میں حصہ لیں گے تو اْنکا لائسنس چیمبر آف کامرس سے منسوخ کر دیا جائے گا۔ قانون نافذ کرنے والے اداروں نے سی سی ٹی وی بسیں زمان پارک اور ہائی کورٹ کے اطراف میں کھڑی کر دیں۔ پنجاب حکومت نے تمام قانون نافذ کرنے والے اداروں کو متحرک کر دیا۔ جو بھی طلبہ اس اختجاج میں قانون کو ہاتھ میں لیں گے اْنکا کیریکٹر سرٹیفکیٹ نہیں بنے گا۔ علاوہ ازیں گرفتاری دینے والے لوگوں کا کریمینل ریکارڈ چیک کیا جائے گا۔ گرفتار شدگان کے ٹیکس اور بینک ریکارڈ کی بھی جانچ کی جائے گی۔ کسی بھی بدعنوانی یا کریمینل کیس میں ملوث گرفتار شدہ افراد کے خلاف فوری کارروائی کا آغاز کیا جائے گا۔ ذرائع نے یہ بھی بتایا کہ چونکہ لاہور کی جیلوں میں قیدیوں کی گنجائش نہیں لہٰذا لوگوں کو میانوالی اور ڈیرہ غازی خان کی جیلوں میں منتقل کرنا پڑے گا۔