پاکستان میں مہنگائی کی شرح میں ریکارڈ اضافہ،38فیصد تک پہنچ گئی

اسلام آباد: ادارہ شماریات ہفتہ وار مہنگائی کے اعدادوشمار جاری کردئیے ، مہنگائی کی مجموعی شرح 38.42 فیصد تک پہنچ گئی ۔ ادارہ شماریات کی جانب سے جاری اعداد و شمار کے مطابق ضمنی بجٹ اور پٹرولیم مصنوعات کی قیمتوں میں اضافے کے اثرات آنے شروع ہو گئے ہیں جس کے بعد ایک ہفتے میں مہنگائی کی شرح میں 2.89 فیصد کا اضافہ ہوگیا، مہنگائی کی مجموعی شرح 38.42 فیصد تک پہنچ گئی، ایک ہفتے میں 34 اشیاء￿ ضروریہ کی قیمتوں میں اضافہ ہوا ، 5 اشیاء کی قیمتوں میں کمی اور 12 کی قیمتوں میں استحکام رہا، ایک ہفتے میں مرغی، گھی، خوردنی تیل اور پٹرولیم مصنوعات مہنگی ہوئیں، 5 لیٹر برانڈڈ خوردنی تیل کی قیمت تین ہزار سے بڑھ گئی، برانڈڈ خوردنی تیل کی قیمت میں ایک ہفتے میں 243 روپے تک کا اضافہ ہوا، ایک کلو گھی کی قیمت میں 44 روپے تک اضافہ ہوا، زندہ مرغی کی فی کلو قیمت ایک ہفتے میں 31 روپے تک بڑھی۔رپورٹ کے مطابق دال ماش فی کلو سات روپے سے زائد اور دال مونگ 3 روپے تک مہنگی ہوئی، ایل پی جی گھریلو سلنڈر 47 روپے تک مہنگا ہوا، گوشت، دودھ، دہی، جلانے کی لکڑی، چینی ، گڑ اور نمک بھی مہنگا ہوا ۔