پی ایس ایل 8، نگراں حکومت کا خصوصی لائٹس کیلئے 80کروڑ دینے سے انکار

لاہور:پاکستان سپر لیگ (پی ایس ایل)کے سیزن 8کے لاہور میں ہونے والے میچز کے موقع پر ہوٹل سے اسٹیڈیم کے روٹ پر کرایے پر لائٹس لگانے کے لیے ٹھیکیدار نے 80کروڑ روپے خرچہ بتا دیا،نجی ٹی وی کے مطابق نگراں وزیرِ اعلی پنجاب محسن نقوی نے لائٹس کی مد میں خطیر رقم دینے سے انکار کر دیا، نگراں وزیرِ اعلی کا کہنا تھا کہ صرف ایچ بی ایل پی ایس ایل کے 9میچز کے لیے سیکیورٹی روٹس پر 80کروڑ روپے نہیں لگا سکتے، پی سی بی خود لائٹس خریدے تو 25کروڑ میں خرید سکتا ہے،دوسری جانب پی سی بی کے ذرائع کا کہنا تھا کہ سیکیورٹی روٹ پر 40جنریٹر اور 120ہیوی فلڈ لائٹس لگائی جاتی ہیں، ایک جنریٹر سے 3پول پر نصب 36 ہیوی لائٹس جلتی ہیں، پی سی بی نے پہلے کبھی روٹ کی فلڈ لائٹس اور جنریٹر کا خرچہ نہیں اٹھایا،ذرائع نے کہا کہ اس بار پی سی بی کو پنجاب حکومت نے یہ خرچہ خود اٹھانے کا کہا ہے، محکمہ ماحولیات کرایے پر چلنے والے جنریٹرز پر تحفظات کا اظہار کر چکا ہے۔