صبا قمر اپنے جعلی ٹوئٹر اکائونٹ پر برہم‘ جعلساز کو کیا کہا؟

لاہور :معروف اداکارہ صبا قمر ٹوئٹر پر اپنا جعلی اکائونٹ دیکھ کر بے حد ناراض اور مایوس ہوئی ہیں اور جعلسازوں کو پیغام دیا ہے کہ وہ بچپنا چھوڑ کر بڑے ہوجائیں۔ ایک سوشل میڈیا صارف نے ان کے نام سے نہ صرف جعلی پروفائل بنائی بلکہ اس پر تصدیق شدہ بلیو ٹک بھی خرید لیا۔صبا قمر نے اپنے اصل اکائونٹ کا اسکرین شاٹ انسٹاگرام اسٹوری میں شیئر کرکے وضاحت دی اور کہا ہے کہ بلیو ٹک کے نشان پر بھروسہ نہ کریں یہ ایک جعلی اکاونٹ ہے، میرا آفیشل ٹوئٹر اکائونٹ یہ ہے۔ صبا قمر نے جعلسازی کرنے والوں کو پیغام دیتے ہوئے کہا کہ چھوٹے نامعلوم اور معمولی پیجز کو شہرت کی خاطر جعلی معلومات پھیلانا بند کرنی چاہئے۔ انہوں نے مزید کہا کہ یہ بچپنا چھوڑیں اور بڑے ہوجائیں کیونکہ توجہ حاصل کرنے کے لیے جعلی اکائونٹ بنا کراس پر پیسہ خرچ کرنا سراسر بچکانہ حرکت ہے۔